Prishtinë, 28 korrik - Ish drejtori i Policisë së Kosovës, Reshat Maliqi thotë se nuk ka pasur plan në polici për aksionin në veri, e as informacion se do të dërgohen policët, ndërkohë që thekson se akoma nuk i din arsyet e shkarkimit nga ana e kryeministrit Thaci. Në një intervistë për "Jeta në Kosovë", Maliqi tha se kishte planifikuar bashkë me ministrin e Brendshëm, Bajram Rexhepi të udhëtonin për pushime këtë javë. Maliqi tha se ditën e aksionit e kishte telefonuar udhëheqësi i Njësisë Speciale dhe i kishte thënë se sapo mori një urdhër nga ministri Rexhepi për përgatitjen e njësisë speciale dhe dërgimin e tyre për në Mitrovicë fillimisht. Por ministri Rexhepi, sipas tij, nuk e kishte thirrur Maliqin për këtë gjë, ndonëse ai ishte drejtori i Policisë. Ai tha se lajmin për shkarkimin e tij e kishte marrë nga televizioni. Maliqi tha se nuk është e vërtetë se ka hezituar për aksionin, dhe as që ai ka dhënë informacione në EULEX. "Mundet që kryeministrin e ka informuar dikush gabim, por kjo nuk qëndron. S'është fare e vërtetë që kam hezituar, unë as që kam pasur dijeni për aksionin. Prandaj nuk qëndron as që unë paskam dhënë inforrmacione në EULEX", u shpreh Maliqi. Ai thotë se ka biseduar me ministrin Rexhepi për ndërmarrjen e aksionit, ndërsa thotë se as ministri Rexhepi nuk ka qenë i informuar se do të ndërmerret aksioni për dërgimin e njësisë speciale në pikat kufitare. Sipas Maliqit, për shkarkimin e tij ka biseduar me ministrin Rexhepi, por, sipas tij, as ministri Bajram Rexhepi nuk i din arsyet e shkarkimit të tij. "Ministri më ka thënë se është vendim i kryeministrit dhe se ai nuk është i njoftuar për arsyet e këtij vendimi". Reshat Maliqi mendon se nuk ka pasur ndonjë plan të përgatitur nga policia dhe se e gjitha ka qenë një organizim shpejt e shpejt, dhe kjo, sipas tij, është bërë për shkak të ndieshmërisë së rastit dhe për t'u mbajtur sa më sekret, që, ai thotë se është e kuptueshme në raste të tilla. /Qendra.info/