Beograd, 21 Korrik 2025 – Njësia izraelite për krime të rënda, Lahav 433, pritet të mbërrijë këtë javë në Beograd për të marrë në pyetje Yisrael Einhornin, ish-këshilltar të lartë të kryeministrit Benjamin Netanyahu dhe aktualisht këshilltar i presidentit serb, Aleksandar Vuçiq. Einhorn është i përfshirë në hetimet për rrjedhjen e dokumenteve konfidenciale dhe aferën e ashtuquajtur “Qatargate”.
Sipas mediave izraelite, Einhorn jeton në Beograd prej vitit të kaluar dhe nuk është kthyer në Izrael që nga nisja e hetimeve për rrjedhjen e dokumenteve të ndjeshme të inteligjencës ushtarake izraelite (IDF). Ai, së bashku me ish-ndihmësin e Netanyahu-t, Jonatan Urih, dhe ish-zëdhënësin Eli Feldstein, dyshohet për përfshirje në vjedhjen e dokumenteve që përfunduan në gazetën gjermane Bild.
Hetuesit po ashtu do të hetojnë rolin e Einhorn në fushatën ndërkombëtare për promovimin e Katarit përmes agjencisë së PR-it “Perception”, të cilën ai e ka themeluar së bashku me Urihin. Fushata është zhvilluar para Kampionatit Botëror “Doha 2022” dhe dyshohet të jetë pjesë e skemës së “Qatargate”.
Einhorn kishte tentuar më herët të arrijë një marrëveshje me prokurorinë izraelite për të shmangur arrestimin në rast se kthehej në Izrael, por bisedimet kishin dështuar. Ai kishte propozuar të merrej në pyetje në Serbi, por prokuroria fillimisht e refuzoi këtë skenar, duke kërkuar kthimin e tij ose nisjen e ekstradimit.
Tashmë, pas një ndryshimi të qëndrimit, autoritetet izraelite kanë vendosur të dërgojnë hetuesit në Beograd për të realizuar marrjen në pyetje në vend./Qendra.info
