Në vetëm gjashtë muajt e parë të vitit 2025, Klinika e Radiologjisë në Qendrën Klinike Universitare të Kosovës ka trajtuar 80,740 pacientë – një fluks rekord që tregon rritje të kërkesave për ekzaminime diagnostike.
Drejtoresha e kësaj klinike, Dr. Shkendije Nuza, tha për Gazeta Shneta se ekzaminimet më të kërkuara janë ato me rëntgen dhe tomografi kompjuterike (CT), ndërsa janë kryer mbi 8,456 rezonanca magnetike dhe 12,856 ekzaminime me CT. Prej tyre, mbi 7,100 janë realizuar gjatë ndërrimeve të rregullta dhe fundjavave, ndërsa pjesa tjetër në raste spitalore dhe ambulatore.
“Klinika jonë ofron një spektër të gjerë shërbimesh, përfshirë rëntgenin, fluoroskopinë, ultrazërin, CT, rezonancën magnetike, mamografinë, endografinë, dhe biopsitë,” deklaroi Dr. Nuza.
Ajo theksoi se përkundër rritjes së konsiderueshme të shërbimeve dhe pajisjeve, numri i radiologëve ka rënë krahasuar me një dekadë më parë: “Para 10 vitesh kishim rreth 30 radiologë, ndërsa sot jemi vetëm 25, ndërkohë që kërkesat dhe teknologjia janë shtuar ndjeshëm.”
Dr. Nuza apelon për investim të mëtejshëm në kapacitetet njerëzore për të përballuar ngarkesën në rritje dhe për të garantuar cilësi në shërbimet mjekësore diagnostike.
Burimi: Gazeta Shneta
