Në këtë mbledhje është diskutuar raporti i Shefit të Misionit të OSBE-së në Kosovë, McGurk, ku Mbretëria e Bashkuar tha se mirëpret mbajtjen e zgjedhjeve të 9 shkurtit, teksa shprehu urgjencën për formimin e qeverisë së re.
“Mbretëria e Bashkuar mirëpret zgjedhjet parlamentare paqësore dhe konkurruese që u mbajtën në Kosovë në shkurt, dhe mbështetjen e rëndësishme që Misioni i ka dhënë Komisionit Qendror të Zgjedhjeve. Ne vazhdojmë të theksojmë tek bashkëbiseduesit në Kosovë urgjencën e formimit të qeverisë”.
“Mbretëria e Bashkuar ndan shqetësimet e ngritura në raportin e Misionit mbi nivelin e tensioneve në katër komunat veriore gjatë periudhës së raportimit. Jemi veçanërisht të shqetësuar për natyrën e pa-koordinuar të mbylljes së institucioneve dhe objekteve në veri të Kosovës, të cilat ofrojnë shërbime jetike për serbët e Kosovës dhe komunitetet e tjera jo-shumicë”, thuhet në deklaratën e Mbretërisë së Bashkuar, transmeton Klankosova.tv.
Tutje, Mbretëria e Bashkuar tha se e inkurajon Qeverinë e Kosovës që të sigurojë që komunitetet jo-shumicë të kenë rol të barabartë në të ardhmen e vendit dhe të përmbush angazhimet e saj si një shtet multi-etnik.
Në këtë raport po ashtu iu kërkua Serbisë që të bashkëpunojë plotësisht që të sillen para drejtësisë përgjegjësit për sulmin ndaj trupave të KFOR-it, në Banjska dhe të përmbushë angazhim për bashkëpunim në hetimin e sulmit ndaj Kanalit të Ibër-Lepencit.
“Ne i bëjmë thirrje të dyja palëve, Kosovës dhe Serbisë, të angazhohen në mënyrë konstruktive në dialogun e lehtësuar nga BE-ja dhe të përmbushin detyrimet e tyre përkatëse, përfshirë krijimin e Asociacionit të Komunave me Shumicë Serbe”.
“Është thelbësore që Kosova dhe Serbia të respektojnë angazhimet e tyre dhe të mos tërhiqen nga marrëveshjet e dialogut. Mos-përmbushja e këtyre angazhimeve ka pasoja negative për jetën e përditshme të qytetarëve dhe për stabilitetin më të gjerë në Ballkanin Perëndimor”, thuhet në deklaratë.
Tutje, Mbretëria e Bashkuar tha se ndan shqetësimin për çështjet e ngritura në Indeksin Botëror të Lirisë së Shtypit, lidhur me mbrojtjen dhe pavarësinë e gazetarëve.
“Ndërsa njohim përparimin e Kosovës në luftën kundër korrupsionit dhe përmirësimin e renditjes në indeksin e perceptimit të korrupsionit të Transparency International, shprehim shqetësim për çështjet e ngritura në Indeksin Botëror të Lirisë së Shtypit lidhur me mbrojtjen dhe pavarësinë e gazetarëve”.
“Ndajmë shqetësimet e raportuara për ndikimin politik në institucionet mediatike dhe mirëpresim aktivitetet e planifikuara të Misionit për avancimin e lirisë së mediave dhe sigurisë së gazetarëve”.
“Mbretëria e Bashkuar është një mbështetëse e gjatë dhe e fuqishme e Kosovës si shtet i pavarur dhe sovran. Gjatë vizitës së Sekretares sonë të Jashtme në Kosovë në fillim të prillit, ajo riafirmoi angazhimin e MB-së për mbështetjen e aspiratave euro-atlantike të Kosovës dhe zhvillimit të saj si një demokraci gjithëpërfshirëse, e ndryshme dhe multi-etnike”.
“Mbretëria e Bashkuar do të vazhdojë të mbështesë stabilitetin, sigurinë dhe bashkëpunimin ekonomik në Ballkanin Perëndimor, përfshirë përmes punës së Përfaqësueses sonë të Veçantë, Dame Karen Pierce, dhe organizimit të Samitit të Procesit të Berlinit në Londër këtë vjeshtë”, thuhet në deklaratë.
