Kryeimami i xhamisë Al-Aksa dhe kreu i Këshillit Islamik të Lartë në Jeruzalem, sheikh Ikrime Sabri, ka paralajmëruar për përpjekje të reja nga Izraeli për të vendosur sovranitetin e tij mbi xhaminë Al-Aksa.
Sheikh Sabri tha se pushteti izraelit po përfiton nga situata aktuale politike dhe ushtarake, veçanërisht nga agresioni në Rripin e Gazës, për të vazhduar mbylljen e xhamisë dhe për të forcuar kufizimet ndaj saj.
Sipas tij, Jeruzalemi është i rrethuar tërësisht dhe Al-Aksa ndodhet nën bllokadë që prej fillimit të sulmeve në Gaza. Ai akuzoi Izraelin për një politikë të qëllimshme që synon largimin e të rinjve dhe besimtarëve nga xhamia, pa asnjë bazë ligjore apo morale.
Sheikh Sabri theksoi se këto masa janë pjesë e një plani për të ndryshuar statusin e vendosur që nga viti 1967 dhe për të vendosur kontroll të plotë izraelit mbi Al-Aksa, si pjesë e një strategjie më të gjerë për izraelitizimin e qytetit të shenjtë.
Ai paralajmëroi për pasoja të rënda dhe tha se këto veprime janë një shkelje e hapur e shenjtërisë së xhamisë dhe një provokim ndaj ndjenjave të miliona myslimanëve në mbarë botën.
Gjithashtu, ai bëri të ditur se grupe hebraike ekstreme po përgatiten të organizojnë marshime provokuese dhe hyrje në grup në oborret e Al-Aksas gjatë festave hebraike, me qëllim vendosjen e realiteteve të reja nën mbështetjen e plotë të forcave të sigurisë izraelite.
Ndërkohë, për të pestën ditë me radhë, forcat izraelite vazhdojnë ta mbajnë të mbyllur xhaminë Al-Aksa, duke mos lejuar as banorët e qytetit të vjetër të hyjnë, përveç disa punonjësve të administratës islame.
Më herët, edhe përfaqësuesi i Hamasit për çështjet e Jerusalemit, Harun Naserudin, e kishte quajtur këtë mbyllje një shkelje flagrante të lirisë së besimit dhe një përpjekje për ta fshirë identitetin islam të xhamisë. Ai i bëri thirrje palestinezëve dhe botës islame që të mobilizohen për të mbrojtur Al-Aksan nga planet e Izraelit. /mesazhi
