Revista prestigjioze britanike The Economist ka publikuar një artikull kritik ndaj presidentit serb Aleksandar Vuçiq, duke theksuar se ai është “në gjunjë” përballë protestave të vazhdueshme studentore që kanë tronditur thellë pushtetin e tij që nga viti 2012.
Sipas artikullit, protestat nisën pas një tragjedie në Novi Sad, ku 16 persona humbën jetën nga shembja e një mbulese betoni në stacionin hekurudhor të sapo rinovuar. Kjo ngjarje ngriti dyshime për korrupsion dhe nxiti një valë pakënaqësie publike.
Vuçiq u përpoq ta zbusë situatën duke ndërruar kryeministrin, por kjo nuk arriti të ndalë protestat. Studentët, që udhëheqin demonstratat, kanë refuzuar bashkëpunimin me partitë tradicionale opozitare dhe kërkojnë drejtësi, transparencë dhe tani edhe zgjedhje të parakohshme.
Sipas The Economist, qeveria e Vuçiqit funksionon mbi baza klienteliste, kontrollon shumicën e mediave dhe mban lidhje të ngushta me Rusinë, ndonëse i ka shitur armë Ukrainës. Ai është përballur edhe më herët me protesta të mëdha, përfshirë kundërshtimin ndaj projektit për nxjerrjen e litiumit, që tashmë konsiderohet strategjik nga BE.
Protestat aktuale kanë arritur kulmin më 15 mars, gjatë asaj që konsiderohet si një nga demonstratat më të mëdha në historinë e Serbisë. Në një moment, turma u përfshi nga paniku pas përdorimit të një arme akustike nga policia.
Revista thekson se festivali i njohur ndërkombëtar Exit në Novi Sad ka humbur mbështetjen shtetërore për shkak të përkrahjes që i ka dhënë protestuesve, dhe se ky do të jetë edicioni i fundit i tij në Serbi.
Vuçiq dhe partia e tij pësuan humbje të ndjeshme në zgjedhjet lokale të 8 qershorit në qytetet Zajeçar dhe Kosjeriq, ku më parë fitonin me mbi 80% të votave. Për këtë arsye, ai refuzon të pranojë mbajtjen e zgjedhjeve të reja.
Ndërkohë, universitetet në vend janë të bllokuara nga studentët dhe qeveria ka ndërprerë pagesat për profesorët – të cilët aktualisht marrin vetëm 12.5% të pagës. Rektori i Universitetit të Beogradit, Vladan Đokić, po përballet me akuza të montuara dhe ka paralajmëruar se qeveria mund të nisë ndjekje penale ndaj anëtarëve të komunitetit akademik që nuk i binden pushtetit.
Sipas The Economist, nëse protesta vazhdon dhe bllokada në universitete thellohet, Serbia mund të përballet me një ndryshim të rëndësishëm politik – dhe figura si rektori Đokić mund të luajnë rol kyç në një epokë të re pas Vuçiqit./Qendra.INFO
