Stefan Veljković, nënkryetar i partisë “Demokracia Serbe”, është sulmuar fizikisht sot në veri të Mitrovicës. Lajmin e ka bërë të ditur vetë Veljković përmes një postimi, ku thotë se sulmi është kryer nga një person i identifikuar si Mustafa.
“Sapo u sulmova fizikisht nga një person i njohur si Mustafa. I njëjti person më parë u përpoq të më shtypte me veturën time. Kur ai ktheu makinën, fillova të xhiroja për ta raportuar në polici, por ai doli nga vetura dhe më sulmoi. Kam marrë lëndime në kokë, buzë dhe qafë,” ka shkruar Veljković.
Ai shton se dyshon që sulmi lidhet me angazhimin e tij politik dhe festimet për Ditën e Vidovdanit.
“Gjithçka ndodhi para shtëpisë sime familjare në Mikronaselje, Mitrovica e Veriut. Në atë kohë, gruaja dhe tre fëmijët e mi ishin brenda,” ka shtuar ai.
Policia e Kosovës ka konfirmuar për “Zubin Potok INFO” se rasti është raportuar dhe dy persona janë duke u marrë në pyetje në stacionin policor. Pas intervistimit, pritet të merren vendimet përkatëse.
Deri tani nuk janë dhënë më shumë detaje mbi ngjarjen.
