Një përleshje fizike mes qytetarëve shqiptarë dhe serbë ka ndodhur sot në lagjen “Kodra e Minatorëve” në Mitrovicën e Veriut, duke rritur tensionet ndëretnike në këtë zonë të brishtë.
Sipas Policisë së Kosovës, nga përleshja janë arrestuar dy persona. Njëri prej tyre është ndaluar për 48 orë me urdhër të prokurorit, ndërsa tjetri është liruar dhe trajtohet si dëshmitar. Një person i tretë është dërguar në spital për trajtim mjekësor për shkak të lëndimeve të marra.
Zëvendësdrejtori i Policisë për rajonin e veriut, Veton Elshani, konfirmoi arrestimet dhe ndërhyrjen e shpejtë të njësive policore.
Burime të Qendra.info bëjnë të ditur se në këtë incident ka qenë i përfshirë edhe Stefan Veljković, nënkryetar i partisë serbe “Demokracia Serbe”. Vetë Veljković ka deklaruar publikisht se është sulmuar fizikisht nga një person shqiptar të cilin e identifikon si “Mustafa”. Sipas tij, i njëjti kishte tentuar ta godiste edhe me veturë pak para përleshjes.
