Një takim i ri mes kryeministrit të Kosovës, Albin Kurti, dhe presidentit serb, Aleksandër Vuçiq, në Shtëpinë e Bardhë, nuk përjashtohet nga skenari diplomatik i administratës Trump – nëse ky i fundit rikthehet në pushtet pas nëntorit.
Kjo është një nga pikëpamjet e dhëna nga Jonathan Moore, ish-diplomat dhe ambasador i lartë i SHBA-së, në një intervistë ekskluzive për gazetarin Xhevahir Qardaku, në “Ditarin e Kosovës”. Moore, njohës i vjetër i rajonit, ka punuar me të dy administratat – republikane dhe demokrate – dhe njihet si zë i peshës në politikën e jashtme amerikane për Ballkanin.
“Trump ndaloi Serbinë nga nisja e një lufte kundër Kosovës,” – thotë Moore, duke theksuar se Shtetet e Bashkuara janë gjithmonë gati për të garantuar paqen në rajon. Megjithatë, ai ngre alarmin për situatën politike në Kosovë, ku sipas tij, mungesa e një qeverie funksionale po pengon seriozisht procesin e dialogut.
“Në Prishtinë nuk ka qeveri për të negociuar. Ai që sot është kryeministër, është në mandat teknik. Opozita e përçarë, parlamenti i bllokuar – Kosova nuk ofron një projekt të qartë për dialogun me Serbinë,” u shpreh diplomati amerikan.
Moore theksoi gjithashtu se mungesa e zbatimit të Asociacionit të Komunave me shumicë serbe, për të cilin Kosova është zotuar në vitin 2013, mbetet një ndër pengesat më të mëdha për progres.
Sa i përket mundësisë së një takimi të ri Kurti–Vuçiq në Uashington, ai u shpreh:
“Formati mund të rikthehet, por pa një qeveri stabile dhe pa vullnet politik, është e vështirë të pritet ndonjë marrëveshje përfundimtare.”
🇺🇸 Në fund, Moore nënvizoi se SHBA mbetet garanci për stabilitetin në rajon dhe nuk do të lejojë përshkallëzim të konfliktit, por theksoi se topi është në fushën e Prishtinës.
A do të arrijë Kosova të konsolidohet politikisht përpara vjeshtës kur priten zgjedhje të reja? Dhe a do të rikthehet Shtëpia e Bardhë si skena e paqes së madhe mes Kosovës dhe Serbisë?
Këto mbeten pyetjet që presin përgjigje.
