Presidentja e Kosovës, Vjosa Osmani, priti në takim kryetarin e LDK-së, Lumir Abdixhikun, në kuadër të përpjekjeve për të tejkaluar ngërçin politik që ka bllokuar konstituimin e legjislaturës së re të Kuvendit të Kosovës.
Takimi me kryetarin e LDK-së vjen pas atyre të zhvilluara me liderin e Lëvizjes Vetëvendosje, Albin Kurti dhe me kryetarin e PDK-së Memli Krasniqi.
Ky është raundi i dytë i takimeve që presidentja Osmani po zhvillon me liderët politikë pas zgjedhjeve të fundit. Ndërsa konsultimet e para ishin mbajtur në një format të përbashkët, kësaj radhe takimet po zhvillohen në mënyrë të ndarë me secilin kryetar partie.
Në vijim të agjendës së saj, presidentja Osmani pritet të takohet gjatë ditës edhe me kryetarin e AAK-së, Ramush Haradinaj.
