Zyra Federale e Prokurorit në Zvicër ka ngritur aktakuzë ndaj një shtetasi të Kosovës nën dyshimet se ka qenë udhëheqës i degës zvicerane të një organizate terroriste nga Kosova.
I njohur si “emir”, ai dyshohet se ka qenë aktiv edhe në lidershipin e kësaj organizate.
I akuzuari dyshohet se ka kryer aktivitete të ndryshme me qëllim indoktrinimin, financimin dhe rekrutimin e anëtarëve të rinj në emër të organizatës terroriste, kryesisht me fokus në rajonin e Gjenevës. Këtë dyshohet se e ka kryer me ndihmën e një personi tjetër me dyshtetësi – zvicerane dhe maqedonase – ndaj të cilit po ashtu është ngritur aktakuzë.
Sipas njoftimit të kësaj prokurorie, të akuzuarit dyshohen se janë angazhuar në aktivitete propagandistike për ideologjinë e organizatës terroriste “Shteti Islamik”, nëpërmjet takimeve të rregullta.
Shtetasi i Kosovës, 36-vjeçar, dhe 33-vjeçari me shtetësi zvicerano-maqedonase, ishin arrestuar më 1 shtator 2022. Hetimet ishin zhvilluar nga korriku i 2021-s.
Siç shkruhet në njoftimin e autoriteteve zvicerane, organizata terroriste në qendër të akuzës ishte themeluar pasi autoritete e Kosovës kishin shuar shoqatën “Këshilla” më 2014 dhe 2015. Sipas aktakuzës, qëllimi i organizatës ka qenë nxitja e sa më shumë besimtarëve për kauzën e saj dhe ideologjinë salafist-xhihadiste, identike me atë të Shtetit Islamik.
Aty thuhet se në periudhën 2014-2015, disa burra shqipfolës, përfshirë dy të akuzuarit, kishin bashkuar forcat për të formuar grupin. Shtetasi i Kosovës u zgjodh “emir” i degës në Gjenevë.
Që prej vitit 2016, dega në Gjenevë u fokusua në financimin e organizatës – në shkallë prej 64 mijë deri 77 mijë euro. Shtetasi i Kosovës dyshohet se ka mbledhur para nga anëtarët në Gjenevë dhe më pas i ka transferuar në Kosovë nëpërmjet aktiviteteve të ndryshme. Të akuzuarit dyshohen edhe për dhënie të ryshfetit për të shmangur ndjekjen penale, raporton Koha.net, përcjell Periskopi
