Presidenti i SHBA-së, Donald Trump u takua me kryeministrin izraelit, Benjamin Netanyahu, për herë të dytë këtë javë për të diskutuar çështjen e Gazës, transmeton Anadolu.
Takimi u zhvillua si pjesë e vizitës së tretë të Netanyahut në SHBA që kur Trump mori detyrën në janar.
Takimi me dyer të mbyllura Trump-Netanyahu në Zyrën Ovale në Shtëpinë e Bardhë zgjati më shumë se një orë dhe thuhet se u përqendrua në përpjekjet e vazhdueshme për të arritur një armëpushim në Gaza.
Në një deklaratë në llogarinë e tij në X, Netanyahu njoftoi përfundimin e takimit të tij të dytë me Trumpin këtë javë.
Duke vënë në dukje se takimi u përqendrua në lirimin e pengjeve në Gaza dhe “eliminimin e kapacitetit ushtarak dhe administrativ të Hamasit”, Netanyahu theksoi se u diskutua edhe për pasojat mbi konfliktin me Iranin dhe pasojat e mundshme që mund të shkaktojë.
Sipas platformës amerikane të lajmeve “Axios”, një delegacion i përbërë nga zyrtarë të Katarit vizitoi gjithashtu Shtëpinë e Bardhë para takimit të Trumpit me Netanyahun dhe zhvilloi disa orë bisedime me zyrtarë të lartë.
Kryeministri Netanyahu u takua me kryetarin e Dhomës së Përfaqësuesve, Mike Johnson, në ditën e dytë të vizitës së tij në Washington. Duke folur për mediat pas takimit, Netanyahu tha se ata po punojnë për sigurimin e armëpushimit në Gaza.
“Ne e pranuam propozimin që erdhi nga ndërmjetësit. Ishte një propozim i mirë. Ajo përputhet me idenë origjinale të (të dërguarit special të Trumpit për Lindjen e Mesme), Steve Witkoff, dhe mendojmë se po i afrohemi më shumë kësaj. Qëllimi ynë është të kalojmë në fazën tjetër”, deklaroi Netanyahu.
Edhe Witkoff në deklaratën e tij dje tha se është bërë përparim në bisedimet për armëpushim dhe shprehu “shpresën” e tij se deri në fund të javës mund të arrihet marrëveshje për armëpushim 60-ditor në Gaza.
