Pas arrestimit dhe paraburgimit të pesë zyrtarëve policorë të dyshuar për përfshirje në rastin tragjik të vdekjes së Agon Zejnullahut në Lipjan, avokati Emrush Kastrati ka reaguar duke kritikuar veprimet e Policisë së Kosovës.
Ai theksoi se forca policore duhet të ndërpritet menjëherë sapo një person të vihet nën kontroll dhe të mos përbëjë më rrezik.
“Në raste të tilla, përdorimi i forcës lejohet vetëm deri në momentin kur agresori neutralizohet dhe prangoset. Çdo veprim pas këtij momenti konsiderohet si tejkalim i autorizimeve”, deklaroi Kastrati për Dukagjinin.
Ai gjithashtu e quajti të papranueshëm veprimin e vendosjes së këmbës në zonën e qafës së viktimës, duke e cilësuar si keqtrajtim të pastër dhe të pajustifikueshëm.
“Nëse nga pamjet dëshmohet se njëri nga policët ia ka vendosur këmbën në qafë apo afër saj, në një kohë kur personi ishte tashmë i prangosur dhe i paaftë për reagim, atëherë kemi të bëjmë me shkelje serioze të kompetencave ligjore”, shtoi ai.
