Kryeministri në detyrë i Republikës së Kosovës, Albin Kurti, ka udhëtuar sot drejt Bosnjë dhe Hercegovinës për të marrë pjesë në ceremoninë përkujtimore të 30-vjetorit të gjenocidit në Srebrenicë, e cila po zhvillohet në Qendrën Memoriale në Potoçari.
Sipas njoftimit të lëshuar nga Qeveria e Kosovës, Kurti po udhëheq delegacionin shtetëror të Kosovës, të përbërë nga ministrja në detyrë e Punëve të Jashtme dhe Diasporës, Donika Gërvalla, dhe zëvendëskryeministrja e tretë në detyrë, Emilija Rexhepi, që njëkohësisht përfaqëson komunitetin boshnjak në Kosovë.
Qeveria e Kosovës ka shpallur 11 korrikun si ditë zyrtare përkujtimore të gjenocidit të Srebrenicës, në nderim të më shumë se 8,000 viktimave që humbën jetën gjatë masakrës së vitit 1995 – një nga ngjarjet më të rënda të luftës në ish-Jugosllavi dhe akt i shpallur gjenocid nga Gjykata Ndërkombëtare e Drejtësisë.
Pjesëmarrja e Kryeministrit Kurti në këtë ngjarje përkujtimore thekson përkushtimin institucional të Kosovës për të nderuar viktimat, ruajtur kujtesën kolektive dhe promovuar drejtësinë e tranzicionit për krimet e së kaluarës në Ballkanin Perëndimor.
