Në qytetin e Lipjanit sot është mbajtur një protestë pas vdekjes tragjike të 27-vjeçarit Agon Zejnullahu, i cili humbi jetën gjatë ndërhyrjes nga pesë zyrtarë policorë të Kosovës, teksa po tentohej arrestimi i tij.
Protesta, e organizuar nga familjarë dhe qytetarë të shqetësuar, filloi para objektit të Komunës së Lipjanit, për të vazhduar më pas drejt stacionit të Policisë në qytet.
Pjesëmarrësit kërkuan drejtësi për Agonin dhe shprehën indinjatën ndaj mënyrës së ndërhyrjes policore që përfundoi me fatalitet. Familja Zejnullahu, e pranishme në protestë, kërkoi hetim të plotë dhe të paanshëm për zbardhjen e rastit.
Ngjarja ka shkaktuar reagime të gjera në opinionin publik, ndërsa autoritetet ende nuk kanë dhënë detaje të plota rreth rrethanave të vdekjes së të riut.
