Presidentja e Kosovës, Vjosa Osmani, ka përsëritur deklaratën se ish-presidenti amerikan, Donald Trump, ka luajtur një rol personal në parandalimin e një përshkallëzimi nga ana e Serbisë në kufirin me Kosovën.
Gjatë një diskutimi në Hudson Institute në SHBA, Osmani tha se Trump ka ndaluar atë që e përshkroi si përpjekje të Beogradit për eskalim në kufi.
“Siç e ka thënë Presidenti Trump, ai e ka parandaluar një tension, e ka parandaluar një eskalim – atë që Serbia po përpiqej ta bënte në kufirin me Kosovën. Ishte angazhimi i tij personal dhe roli i tij që e parandaloi, dhe kjo është një dëshmi e lidershipit të vërtetë në ruajtjen e paqes”, u shpreh Osmani.
Ajo shtoi se paqja nuk duhet të merret si e mirëqenë dhe se roli i Shteteve të Bashkuara është jetik për ruajtjen e saj, veçanërisht në rajonin e Ballkanit.
Osmani po qëndron për vizitë zyrtare në SHBA, ku ka zhvilluar takime në Departamentin e Shtetit dhe në qendra të njohura kërkimore që merren me çështjet e politikës së jashtme dhe Ballkanit.
Ndërkohë, këto deklarata nuk janë komentuar nga Qeveria e Kosovës. Ministri i Brendshëm në largim, Xhelal Sveçla, ka deklaruar se për këtë çështje “duhet pyetur Presidentja”.
