Presidenti i Shqipërisë, Bajram Begaj, ka zhvilluar një vizitë zyrtare në qytetin e Ohrit, me ftesë të Presidentes së Maqedonisë së Veriut, Gordana Siljanovska-Davkova.
Përmes një postimi në Facebook, Begaj njoftoi se gjatë takimit është diskutuar për thellimin e bashkëpunimit bilateral dhe rajonal, si dhe për integrimin evropian të dy vendeve.
“Shqipëria dhe Maqedonia e Veriut ndajnë vullnetin për të bashkëpunuar në projekte me vlerë për qytetarët tanë. Faktori shqiptar në Maqedoninë e Veriut është urë lidhëse, i rëndësishëm dhe garanci për progresin e vazhdueshëm të marrëdhënieve tona,” theksoi Begaj.
Ai shtoi se zhvillimi i projekteve të përbashkëta ekonomike, infrastrukturore, kulturore dhe sociale është i arritshëm dhe i mirëpritur nga të dyja palët.
“Me forca të përbashkëta drejt progresit!”, përfundoi Presidenti shqiptar.
