Në Dhomat e Specializuara në Hagë, sot kanë dëshmuar dy eksperte të mjekësisë si dëshmitare të avokatit të viktimave në procesin gjyqësor ndaj Hashim Thaçit, Kadri Veselit, Rexhep Selimit dhe Jakup Krasniqit.
Chatherine Nicola-Black, psikiatre dhe eksperte ligjore, dhe Karin Duhne-Prinsen, specialiste e ndikimeve psikologjike të ndalimit dhe traumës, janë të vetmet dëshmitare të ftuara nga mbrojtësi i viktimave në këtë proces.
Në dëshminë e saj, Nicola-Black theksoi ndikimin e mungesës së drejtësisë dhe mbështetjes institucionale mbi shëndetin mendor të viktimave.
“Nga përvoja klinike, mungesa e drejtësisë apo mosnjohja e përvojës personale të viktimave shkakton zhvlerësim emocional, çka e përkeqëson traumën dhe pengon procesin e shërimit,” tha ajo. “Vetë rrëfimi i përvojës traumatike është shpesh një akt terapeutik.”
Nga ana tjetër, Duhne-Prinsen theksoi se ndalimi është një ndër përvojat më sfiduese për individin dhe shpesh lidhet me pasoja të thella psikologjike.
“Sipas studimeve dhe përvojës sonë, personat që kanë përjetuar ndalim e posaçërisht torturë gjatë tij, shfaqin simptoma të rënda dhe të gjata, përfshirë ankth të vazhdueshëm, pagjumësi, shmangie të situatave që kujtojnë traumën, dhe vështirësi në përjetimin e emocioneve pozitive.”
Ekspertet theksuan se ndalimi shoqërohet me humbje të plotë të kontrollit personal, çka e bën përvojën edhe më traumatizuese sesa katastrofat natyrore, për shkak të varësisë ndaj personave që e ushtrojnë atë kontroll.
Raporti i përbashkët i Black dhe Duhne-Prinsen identifikon si pasoja të zakonshme të torturës: kujtime të pavullnetshme të traumës, reagime të forta emocionale, izolim social, frikë kronike, ndjenja faji dhe shqetësime të rënda të shëndetit mendor.
Dëshmia e tyre është pjesë e argumentit të përfaqësuesit të viktimave që synon të dëshmojë dëmin e thellë psikologjik të shkaktuar nga veprimet për të cilat akuzohen ish-krerët e UÇK-së.
