Preshevë, 16.07.2025 – Komuna e Preshevës dhe Këshilli Kombëtar Shqiptar kanë nënshkruar sot një Memorandum Bashkëpunimi, i cili zyrtarizon bashkërendimin institucional për ndërtimin dhe funksionalizimin e dy institucioneve me rëndësi strategjike për Luginën e Preshevës: Muzeut të Preshevës dhe Shkollës së Muzikës.
Ky projekt i rëndësishëm, i mbështetur financiarisht nga Qeveria e Republikës së Kosovës, përfaqëson shumë më tepër se një investim infrastrukturor. Ai është një akt i kujdesit dhe përkushtimit ndaj ruajtjes së identitetit kulturor, ndërtimit të kujtesës kolektive dhe forcimit të shpresës për të ardhmen e brezave në Luginë.
Përkrahja e Republikës së Kosovës për këtë nismë nuk është vetëm financiare, por edhe vëllazërore e kombëtare. Ajo është një mesazh i fuqishëm se Lugina nuk është e harruar dhe se bashkëpunimi ndërinstitucional me vizion është çelësi për kapërcimin e çdo pengese.
Ky Memorandum shënon një hap të parë domethënës drejt fuqizimit të infrastrukturës kulturore dhe arsimore në Luginë – një fillim i mbarë që hap rrugën për projekte të tjera zhvillimore në të ardhmen.
