Deputeti i LDK-së, Avdullah Hoti, ka reaguar ashpër ndaj kryeministrit në detyrë Albin Kurti dhe presidentes Vjosa Osmani, duke i akuzuar për mashtrim të elektoratit dhe dështim në udhëheqjen e vendit gjatë mandatit pesëvjeçar.
“Dy krerët e shtetit, kryeministri dhe presidentja, tanimë kanë hyrë në historinë politike të Kosovës si mashtrues të elektoratit dhe dëmtues të shtetit,” ka shkruar Hoti.
Ai i quan përpjekjet e tyre të fundit si “dëshpëruese”, duke theksuar se po mbajnë të bllokuara institucionet, po shmangin drejtësinë dhe po e lënë korrupsionin të lulëzojë.
Hoti shton se skena politike sot është pa ide, pa guxim dhe pa vizion për zgjidhje, ndërsa akuzon presidenten se po përpiqet të mashtrojë sërish për një mandat të ri apo rikthim në garën politike.
