Drejtori i Policisë së Kosovës, Gazmend Hoxha, ka deklaruar se institucionet e sigurisë janë të gatshme për të përballuar çdo zhvillim, pas kërcënimeve të fundit të presidentit të Serbisë, Aleksandar Vuçiq.
Në një konferencë për media të mbajtur në Agjencinë për Menaxhimin e Emergjencave (AME), Hoxha u shpreh se situata e përgjithshme e sigurisë në vend është e qetë dhe stabile, me përjashtim të pjesës veriore, të cilën e cilësoi si të brishtë për shkak të veprimtarisë së grupeve kriminale dhe ndërhyrjeve politike nga Serbia.
“Ne jemi të përgatitur për të gjitha sfidat që mund të ndodhin në vendin tonë. Situata e sigurisë është e qetë dhe stabile, përveç pjesës së Veriut, ku ajo vazhdon të jetë e brishtë për shkak të veprimeve të politikës së Serbisë dhe grupeve kriminale, ekstremiste e terroriste,” u shpreh Hoxha.
Ai shtoi se qëllimet e politikës serbe janë të njohura dhe se nuk kanë kontribuar asnjëherë në paqen dhe sigurinë e Kosovës.
Konteksti i tensionuar: Arrestimi i Igor Popoviqit
Tensionet janë rritur pas arrestimit të ndihmësdrejtorit të të ashtuquajturës “Zyrë për Kosovën”, Igor Popoviq, javën e kaluar në Hoçë të Rahovecit. Popoviq akuzohet për deklarata nxitëse kundër Ushtrisë Çlirimtare të Kosovës.
Presidenti serb Aleksandar Vuçiq, reagoi ashpër ndaj arrestimit, duke e cilësuar atë si një “provokim të qëllimshëm” nga qeveria në Prishtinë.
“Arrestimi i Igor Popoviqit tregon se Kurti e ka humbur arsyen dhe dëshiron të nxisë konflikte në Ballkanin Perëndimor,” deklaroi Vuçiq për televizionin serb Pink.
Ai paralajmëroi për pasoja të paparashikueshme, ndërsa bëri të ditur se Serbia ka informuar partnerët ndërkombëtarë për situatën.
Qëndrimi i Qeverisë së Kosovës
Kryeministri në detyrë, Albin Kurti, reagoi duke i quajtur deklaratat e Vuçiqit kërcënuese, destabilizuese dhe të papranueshme. Ai mbrojti vendimin për arrestimin e Popoviqit, duke theksuar nevojën për zbatim të ligjit dhe mbrojtje të rendit kushtetues në të gjithë territorin e Republikës së Kosovës.
