Kukulla më e kërkuar e momentit në Kosovë nuk është një princeshë apo superhero. Quhet “Labubu” dhe ndonëse duket si një lodër e pafajshme, profesionistët e shëndetit mendor paralajmërojnë: nuk është e përshtatshme për fëmijët.
Fenomeni “Labubu” po përhapet me shpejtësi në Kosovë, duke pushtuar raftet e lodrave, rrjetet sociale dhe imagjinatën e fëmijëve. Por përtej pamjes së saj interesante dhe shpesh të frikshme, ekspertët po ngrejnë alarmin.
“Pamja e veçantë dhe ngjyrat e forta e bëjnë vizualisht tërheqëse për fëmijët. Megjithatë, kemi parë rritje të rasteve me ankth, frikë nga errësira apo vështirësi në gjumë të lidhura me këtë kukull,” thotë psikologia Albana Demiri për Klan Kosova.
Sipas saj, ndikimi emocional i kukullave si Labubu shpesh nënvlerësohet nga prindërit, të cilët e shohin thjesht si modë kalimtare. Por Demiri thekson se ndërveprimi i fëmijës me lodrën mund të ndikojë në përjetimet e tij emocionale.
Nuk është krijuar për fëmijët
Psikologia Bardha Myrtaj shkon më tej duke deklaruar se “Labubu” nuk është lodër për fëmijë, por një produkt artistik i dizajnuar për të rritur dhe adoleshentë.
“Nuk është një kukull për të qetësuar fëmijët, por për të reflektuar emocionet e brendshme të të rriturve,” thotë Myrtaj, duke shtuar se pamja e çuditshme e Labubu-s përfaqëson një formë të pranimit të vetes me të gjitha anët – edhe ato që shoqëria i shmang.
Ajo madje vë në pah një aspekt social: “Labubu po bëhet simbol i një brezi të ri meshkujsh që shprehin më lirshëm emocionet, ndjeshmërinë dhe kujdesin për veten.”
Çmimet dhe popullariteti në rritje
Në Kosovë, një kukull “Labubu” kushton mes 10 dhe 20 euro, varësisht nga madhësia dhe shitësi. Rrjetet sociale janë mbushur me faqe që shesin ose reklamojnë kukullat, ndërsa reagimet janë të përziera – nga entuziazmi deri te shqetësimi.
Ndërkohë, në tregun global çmimet janë shumë më të larta. Kukulla origjinale “Labubu” të kompanisë Pop Mart shiten deri në 85 dollarë copa, ndërsa në faqe si StockX, një Labubu arrin çmimin prej 310 dollarësh.
Fotografi nga faqet në Kosovë që sheshin kukullën “Labubu” online
Historia pas kukullës
“Labubu” u krijua nga ilustruesi nga Hong Kongu, Kasing Lung, në vitin 2015 si pjesë e serisë “The Monsters”. Lodrat prodhohen nga gjiganti kinez Pop Mart, i cili ka shënuar fitime rekord, vetëm në Kinë duke tejkaluar 1.09 miliard dollarë vitin e fundit.
Por Labubu nuk mori famë ndërkombëtare deri në vitin 2024, kur ylli i K-pop-it Lisa nga “Blackpink” publikoi kukullat në Instagram-in e saj, duke ndezur një valë trendesh në TikTok dhe rrjetet sociale.
A është thjesht lodër apo më shumë?
Për disa është një lodër e çuditshme. Për të tjerët një simbol i vetëpranimit apo një trend estetik. Por një gjë është e sigurt: “Labubu” po ndez diskutime të forta – në shtëpi, rrjete sociale dhe midis profesionistëve të shëndetit mendor.
Këshilla për prindërit:
Ekspertët këshillojnë që para se t’i blejnë një lodër të tillë fëmijës, të mendojnë për përmbajtjen emocionale që ajo përçon dhe të vëzhgojnë me kujdes sjelljet e fëmijës pas ndërveprimit me të.
