Gjykata e Lartë në Beograd ka vendosur masën e paraburgimit prej 30 ditësh për Lulzim Halilin, shtetas shqiptar i arrestuar disa ditë më parë nga autoritetet serbe.
Sipas përgjigjes zyrtare nga kjo gjykatë, Halili akuzohet për “kryerjen e veprës penale të organizimit dhe nxitjes së kryerjes së gjenocidit dhe krimeve të luftës”, raporton Koha.net, përcjell Periskopi.
Halili u arrestua në afërsi të qytetit Svilajnac, rreth 100 kilometra larg kryeqytetit serb, dhe u transferua menjëherë në mbajtje në Stacionin Policor të atij lokaliteti.
Ndërkohë, Ministria e Punëve të Jashtme dhe Diasporës e Kosovës ka njoftuar se deri më tani nuk ka marrë asnjë informacion zyrtar nga autoritetet serbe lidhur me rastin e Halilit.
MPJD ka deklaruar se, sapo të konfirmohet zyrtarisht masa e paraburgimit dhe hapja e procedurës penale ndaj tij, Zyra Ndërlidhëse e Kosovës në Beograd do të parashtrojë kërkesë për të realizuar vizitë në Qendrën e Mbajtjes.
