Policia e Fierit ka arrestuar një person të tretë në lidhje me vrasjen makabre të 56-vjeçarit Anesti Rama, që ndodhi pak ditë më parë në fshatin Frashër. Në pranga ka rënë Çlirim Dogani, 55 vjeç, i dyshuar si bashkëpunëtor në këtë krim të rëndë bashkë me vajzën e viktimës, Ermalinda Rama, 26 vjeç.
Sipas hetimeve paraprake, Dogani ka bashkëpunuar me të dashurën e tij në vrasjen e babait të saj, duke përdorur tel për mbytje, mjete të forta dhe prerëse. Ngjarja ka ndodhur për motive të dobëta, ndërsa hetimet për zbardhjen e plotë të rrethanave vijojnë.
Në deklaratën e policisë thuhet:
“Specialistët e Seksionit për Hetimin e Krimeve Kundër Personit në Drejtorinë Vendore të Policisë Fier bënë ndalimin e shtetasit Ç. D., 55 vjeç. Nga hetimet dyshohet se ky shtetas ka bashkëpunuar me shtetasen E. R., në vrasjen e babait të saj.”
Lidhja e dyshes:
Burime për A2CNN bëjnë të ditur se lidhja midis Ermalindës dhe Çlirimit dyshohet të jetë krijuar gjatë qëndrimeve të saj te motra në fshatin Suk të Roskovecit, ku e reja punonte në serat bujqësore.
Pas ngjarjes, përveç Ermalindës, autoritetet arrestuan edhe nënën e saj, Valbona Rama, e dyshuar si bashkëpunëtore në krim.
Materialet hetimore janë referuar në Prokurorinë e Fierit për veprime të mëtejshme.
