Anëtarja e Këshillit Bashkiak të Tiranës, Joleza Koka, ka dorëzuar zyrtarisht të enjten një kërkesë për emërtimin e një rruge në Tiranë, “Palestina e Lirë”.
Propozimi, që tashmë është firmosur edhe nga disa anëtarë të tjerë të Këshillit, do t’i kalojë për shqyrtim komisionit përkatës pranë Bashkisë së Tiranës.
“Ky propozim simbolik vjen në një kohë kur nga 193 shtete anëtare të OKB-së, 147 e njohin tashmë zyrtarisht Shtetin e Palestinës – një dëshmi e mbështetjes globale për të drejtën e vetëvendosjes dhe jetesës në paqe”, deklaroi Koka.
Disa ditë më parë, qindra qytetarë u mblodhën në Sheshin Skënderbej në një protestë të organizuar nga kolektiva të shoqërisë civile si Free Palestine Collective, Antifa Tirana dhe Kolektivi Feminist.
Protesta, e mbajtur nën moton “Stop urisë, lejoni jetën”, dënoi ashpër krizën humanitare në Gaza dhe kërkoi një fund të menjëhershëm të asaj që shumë organizata ndërkombëtare e përshkruajnë si gjenocid.
Pjesë e protestës ishte edhe një mesazh solidarizues nga aktivistja globale Greta Thunberg.
“Nëse besojmë te paqja dhe të drejtat e njeriut, nuk mund të heshtim përballë një gjenocidi të transmetuar live cdo dite para syve tanë – Palestina meriton drejtësi”, ravijëzoi Koka.
