Rreth orës 07:00 të mëngjesit të së enjtes, në kryqëzimin e njohur si “te Centralla” në Preshevë, ka ndodhur një aksident trafiku ku janë përfshirë një veturë e xhandarmërisë serbe dhe një veturë civile.
Si pasojë e këtij incidenti, është raportuar bllokim i përkohshëm i qarkullimit në zonën përreth, duke detyruar shumë qytetarë të përdorin rrugë alternative për të vazhduar lëvizjen brenda qytetit. Fatmirësisht, deri më tani nuk është raportuar për të lënduar rëndë.
Burime lokale bëjnë të ditur se në vendin e ngjarjes kanë dalë menjëherë ekipet e hetimeve dhe autoritetet përkatëse për të shqyrtuar rrethanat e aksidentit. Edhe pse në këtë kryqëzim ka semaforë të instaluar, ato aktualisht nuk janë në funksion, për shkak të një vendimi të mëhershëm nga pushteti lokal.
Me rritjen e fluksit të automjeteve gjatë kësaj periudhe të verës, për shkak të rikthimit të mërgimtarëve në vendlindje, autoritetet apelojnë për kujdes të shtuar në trafik, sidomos në nyjet kyçe dhe kryqëzimet më të ngarkuara.
