Joga prenatale po vlerësohet gjithnjë e më shumë si një praktikë ideale për gratë shtatzëna që kërkojnë një balancë mes mirëqenies fizike dhe qetësisë mendore. Sipas burimit Parents, përcjell Gazeta Shneta, kjo formë e jogës ndihmon trupin të përshtatet me ndryshimet e shumta gjatë shtatzënisë, duke forcuar muskujt e pjesës së poshtme të trupit, përfshirë muskujt e legenit – përgatitje thelbësore për procesin e lindjes.
Teknikat e frymëmarrjes së thellë dhe të vetëdijshme që mësohen në joga, janë çelësi për relaks dhe përballim më të lehtë të dhimbjeve gjatë lindjes. Kjo qasje ndihmon në uljen e tensionit, redukton frikën dhe rrit vetëbesimin e grave gjatë momentit të lindjes.
Përveç përfitimeve emocionale, joga prenatale ndihmon edhe në lehtësimin e shqetësimeve të përditshme gjatë shtatzënisë – si dhimbjet e shpinës, të përzierat, pagjumësia dhe gulçimi. Përmirëson qarkullimin e gjakut dhe rrit furnizimin me oksigjen për nënën dhe foshnjën.
Një aspekt po aq i rëndësishëm është edhe krijimi i lidhjes shpirtërore me beben. Klasa e jogës ofron një hapësirë të qetë për reflektim, por edhe një mundësi për të ndarë përvoja me nëna të tjera, duke ndërtuar mbështetje dhe komunitet.
Studimet tregojnë se praktika e rregullt e jogës gjatë shtatzënisë mund të ulë rrezikun për lindje të parakohshme dhe të ndihmojë në lindjen e foshnjës me peshë të shëndetshme. Në këtë mënyrë, joga prenatale bëhet një aleat i çmuar për një shtatzëni më të lehtë dhe më të lumtur.
