Spanja ka ndërmarrë një tjetër hap solidariteti me popullsinë civile në Rripin e Gazës, duke dërguar 12 ton ushqime nga ajri, në kuadër të përpjekjeve për të zbutur krizën humanitare në këtë zonë të goditur rëndë nga uria dhe sulmet e vazhdueshme izraelite.
Sipas njoftimit të Ministrisë së Jashtme të Spanjës, furnizimi u realizua me një avion ushtarak A400 të Forcave Ajrore Spanjolle, i cili hodhi 24 pako ndihmash, secila me peshë 500 kilogramë, që përmbanin rreth 2,500 racione ushqimore.
Ministri i Jashtëm spanjoll, Jose Manuel Alvarez, konfirmoi gjithashtu se kamionët me ndihma humanitare nga Spanja janë tashmë në pritje në kufirin me Gazën dhe pritet të hyjnë në territor në ditët në vijim.
Operacioni i ndihmës vjen në një kohë kur situata humanitare në Rripin e Gazës po përkeqësohet përditë, me raportime për mungesa të rënda ushqimore dhe qindra mijëra njerëz të zhvendosur. Spanja i bashkohet kështu Francës, Britanisë së Madhe dhe vendeve të tjera që kanë ndërmarrë dërgesa ajrore për të ndihmuar popullatën civile të rrezikuar.
Kriza në Gaza është cilësuar nga organizatat ndërkombëtare si një nga më të rëndat në dekadat e fundit, duke shtuar thirrjet për ndërhyrje të menjëhershme ndërkombëtare dhe zgjidhje politike afatgjata.
