Qendra Kombëtare për Menaxhimin Kufitar ka njoftuar se janë shënuar përmirësime në kohën e pritjes në disa prej pikave kufitare të Kosovës.
Sipas të dhënave të përditësuara, situata në pikën kufitare të Dheut të Bardhë është përmirësuar ndjeshëm krahasuar me orët e mëngjesit. Aktualisht, pritjet në hyrje dhe dalje nga Kosova variojnë deri në një orë, ndërsa më herët ato arrinin deri në dy orë.
Edhe në pikën kufitare të Muçibabës është raportuar një ulje e pritjeve, ku qytetarët po presin deri në 40 minuta për të hyrë në territorin e Kosovës.
Ndërkohë, në të gjitha pikat e tjera kufitare situata është më e qetë, me pritje që variojnë nga 5 deri në 15 minuta.
Qendra Kombëtare për Menaxhimin Kufitar vazhdon të monitorojë gjendjen në kohë reale dhe u bën thirrje qytetarëve të informohen përpara se të planifikojnë udhëtimet e tyre.
