Hamasi ka deklaruar se nuk do të heqë dorë nga armët përveçse në rast se krijohet një shtet palestinez i pavarur me kryeqytet Jerusalemin. Kjo deklaratë vjen si përgjigje ndaj raportimeve të mediave, të cilat cituan të dërguarin amerikan Steve Witkoff, që pretendonte se Hamasi kishte shfaqur gatishmëri për çarmatim.
Në reagimin e tij, Hamasi theksoi:
“Rezistenca dhe krahët e saj janë një e drejtë legjitime kombëtare dhe ligjore për sa kohë që pushtimi vazhdon. Kjo e drejtë njihet nga ligjet dhe normat ndërkombëtare dhe nuk mund të hiqet dorë prej saj, përveçse nëpërmjet rivendosjes së plotë të të drejtave tona kombëtare – para së gjithash, krijimit të një shteti palestinez të pavarur, plotësisht sovran me Jerusalemin si kryeqytet.”
Gjithashtu, Hamasi e quajti vizitën e Steve Witkoff dhe ambasadorit të SHBA-së në Izrael, Mike Huckabee, në një qendër ndihmash në Gaza si një “shfaqje të paramenduar”, e cila sipas tyre kishte për qëllim manipulimin e opinionit publik dhe dhënien e përkrahjes politike për fushatën izraelite në Gaza.
Witkoff deklaroi se kaloi mbi pesë orë në Gaza dhe përmes një postimi në X (ish-Twitter), tha:
“Qëllimi i vizitës ishte t’i jepte presidentit Trump një kuptim të qartë të situatës humanitare dhe të ndihmonte në hartimin e një plani për të ofruar ndihmë ushqimore dhe mjekësore për popullin e Gazës.”
