Një tjetër episod i rëndë i gjuhës së urrejtjes dhe ksenofobisë është shënuar të shtunën mbrëma në Kumanovë, gjatë ndeshjes së basketbollit mes Maqedonisë së Veriut dhe Rumanisë, e vlefshme për kualifikimet drejt Kupës së Botës 2027.
Gjatë ndeshjes, një pjesë e tifozëve shpërthyen në thirrje skandaloze dhe raciste ndaj shqiptarëve. Në kore të sinkronizuara, ata bërtitën slogane të rënda si:
- “Shqiptari i mirë është shqiptari i vdekur”,
- “Dhoma të gazit për shqiptarët”,
- “Maqedoni e pastër, e pastër, e pastër”,
- dhe “Shqiptarët e mallkuar ta dijnë, emri maqedonas nuk zhduket”.
Pamjet dhe audio-incizimet e publikuara nga agjencia INA konfirmojnë qartazi fjalët që shkelin rëndë parimet e tolerancës, bashkëjetesës dhe respektit ndër-etnik në një shoqëri demokratike.
Në sallën ku u zhvillua ndeshja ishin të pranishëm edhe figura të larta shtetërore si kryeministri Hristijan Mickoski, kryetari i Kumanovës Maksim Dimitrievski, ministri i punëve të jashtme Panço Toshkovski, zëvendëskryeministri Ivan Stoilkoviç, si dhe zyrtarë të tjerë shtetërorë – por pavarësisht kësaj, nuk u ndërmor asnjë veprim për të ndalur gjuhën e urrejtjes, as ndonjë reagim zyrtar më pas nga autoritetet përgjegjëse.
Ngjarja ka nxitur reagime të ashpra nga përfaqësues shqiptarë në qeverinë e Maqedonisë së Veriut. Zëvendëskryeministri i parë, Izet Mexhiti, përmes një postimi publik, dënoi ashpër ngjarjen:
“Thirrjet raciste dhe anti-shqiptare nuk kanë vend në shoqërinë tonë. Ato janë një sulm i drejtpërdrejtë ndaj bashkëjetesës dhe barazisë që duam ta ruajmë në vendin tonë.”
Edhe zëvendëskryeministri tjetër, Arben Fetai, e cilësoi sjelljen si “tradhti të turpshme ndaj vlerave të sportit dhe fair play-it”.
“Ksenofobia dhe urrejtja nuk kanë vend as në stadiume, as në të ardhmen tonë të përbashkët. Institucionet duhet të veprojnë, jo të heshtin,” theksoi Fetai, duke i bërë thirrje autoriteteve që të marrin masa të qarta dhe të vendosura.
Reagime ka pasur edhe nga Bashkimi Demokratik për Integrim (BDI), i cili shprehu “indinjatën dhe revoltën më të thellë” për atë që e quajti një ngjarje skandaloze dhe rrezik për paqen sociale.
Përballë heshtjes së autoriteteve maqedonase, shqetësimi për përkeqësimin e klimës ndëretnike po rritet, ndërkohë që opinion publik dhe faktorë politikë kërkojnë reagim institucional të menjëhershëm dhe ndëshkim për çdo formë të gjuhës së urrejtjes.
