Deputeti shqiptar në Parlamentin e Serbisë, Shaip Kamberi, ka njoftuar se ka dorëzuar kallëzim penal ndaj kryetares së Kuvendit të Serbisë, Ana Bërnabiq, për nxitje të urrejtjes mbi baza kombëtare, racore dhe fetare.
Sipas Kamberit, kallëzimi penal është bërë në bashkëpunim me deputetët Ahmedin Skrijelj dhe Minela Kalender, pas deklaratës së Bërnabiq në një konferencë për media pas protestave në Novi Pazar. Gjatë prononcimit të saj, Bërnabiq kishte thënë: “Dëgjuam thirrjen ‘Allahu Ekber’ dhe gjëra të tjera të neveritshme” — një koment që Kamberi e konsideron ofendues dhe stigmatizues për fenë islame dhe për komunitetet që e praktikojnë.
Ai thekson se një deklaratë e tillë kontribuon në përforcimin e stereotipeve negative dhe përshkruan qytetarë të caktuar si “të huaj” apo “të rrezikshëm”, në një shoqëri që ende vuan pasojat e nacionalizmit të viteve ’90.
Kamberi ka sqaruar se veprimi i tij nuk është i motivuar politikisht, por përbën një thirrje për drejtësi. Ai thekson se përdorimi i gjuhës së urrejtjes nuk duhet të trajtohet vetëm si çështje politike apo morale, por para së gjithash si një çështje ligjore.
