Hamasi ka publikuar një video me pamje tronditëse, që tregojnë pengun izraelit Eviatar David, 24 vjeç, duke hapur varrin e tij në një tunel në Gaza. “Nuk kam ngrënë prej ditësh”, thotë ai, duke treguar një kanaçe me ushqim që duhet ta konsumojë për dy ditë.
Videoja, e cila zgjat gati 5 minuta dhe u publikua me pëlqimin e familjes së tij, ka shkaktuar zemërim global. Familja e Davidit i përshkroi imazhet si “të tmerrshme”.
“Jemi të detyruar të shohim djalin dhe vëllain tonë të dashur, Eviathar David, të vdesë nga uria qëllimisht dhe në mënyrë cinike në tunelet e Hamasit në Gaza – një skelet i gjallë, i varrosur i gjallë”, tha familja në një deklaratë.
Kryeministri izraelit Benjamin Netanyahu e dënoi aktin si abuzim cinik, degradues dhe të qëllimshëm të pengjeve. I mbijetuari i Holokaustit, Naftali Furst, duke parë pamjet, tha: “E njoha urinë dhe terrorin në kampe. Më kujtoi poshtërimin e plotë të dinjitetit njerëzor”.
Vëllai i Eviatarit, Eli, i bëri thirrje Donald Trump të ndërmarrë veprime: “Heshtja është bashkëfajësi. Ai është në prag të vdekjes. Bëni diçka tani.” Videoja e Davidit ishte e dyta këtë javë, pas asaj të pengut tjetër Rom Braslavsky që konfirmon dëshpërimin e të mbijetuarve dhe tmerrin që vazhdon pas tuneleve të Gazës.
Eviatar David, 24 vjeç, është mbajtur rob që kur u rrëmbye nga Hamasi në një festival muzikor në Izraelin jugor më 7 tetor 2023. Gjatë sulmit të tij ndaj Izraelit gati dy vjet më parë, Hamasi mori 251 pengje. Davidi është një nga 49 pengjet që Izraeli thotë se ende mbahen në Gaza. 27 pengje besohet të kenë vdekur.
