Ish-deputetja e Lidhjes Demokratike të Kosovës, Rrezarta Krasniqi, ka reaguar pas postimit të deputetes së VV-së, Arbreshë Kryeziu, ndaj të ngarkuarës me punë në Ambasadën e Amerikës.
Krasniqi ka kërkuar largimin e menjhershëm të kësaj kaste politike, për të cilët tha se po i sjellin sanksione Kosovës nga vendet mike.
“Këta njerëz çdo ditë po e dëshmojnë që janë të pafytyrë dhe po e dëmtojnë rëndë vendin. Kjo është e patolerueshme dhe këta deputetë vetëm interesat e popullit nuk i përfaqësojnë. Kjo mendësi i ka sjellë vendit masat që i kemi nga BE-ja, humbjen e fondeve dhe investimeve evropiane. Kryeministri Kurti dhe të gjithë vartësit e tij po i shkatërrojnë marrëdhëniet tona me ShBA dhe po sjellin sanksione nga vendet mike të BE-së.
Sa më parë duhet të largohen nga pozitat shtetërore këta amaterë politik. Populli i Kosovës ka besim të plotë ndaj Gjykatës Kushtetuese dhe Ambasada e Amerikës është e shenjtë për çdo qytetar të vendit”, thuhet në postimin e Krasniqit.
