Një tjeter ngjarje tragjike ndodhi sot në mesditë në Tetovë, ku një 46-vjeçar humbi jetën si pasojë e një shkëmbimi zjarri në kryqëzimin e rrugës “Ilinden” me rrugën “Bllagoja Toska”. Incidenti u zhvillua mes dy automjeteve dhe shkaktoi plagosjen edhe të dy kalimtarëve të rastit.
Një vajzë 13-vjeçare, e cila u plagos në këmbë, u dërgua menjëherë në Spitalin e Tetovës, ndërsa një person i moshuar u transportua si rast urgjent në Qendrën Klinike në Shkup.
Sipas informacionit nga SPB Tetovë, një nga automjetet e përfshira ishte një “Ford Fiesta” me targa të Tetovës, të cilat rezultuan të çregjistruara dhe të lidhura me personin E.M. (19) nga fshati Gajre i Tetovës. Në vendngjarje u gjet edhe një “Volkswagen Golf” me targa të Tetovës, në pronësi të F.R. (46) nga Tetova, në të cilin u gjet personi i vdekur me plagë nga arma e zjarrit.
Autoritetet po vazhdojnë kërkimet për autorët e ngjarjes, dhe jozyrtarisht raportohet se ata kanë lëvizur drejt Jazhincës, në drejtim të kufirit me Kosovën.
Mësohet se ky incident është një përplasje mes familjeve rivale Tërziu nga Tetova dhe një familjeje tjetër./Qendra.Info
