Një tragjedi e rëndë tronditi sot Gjilanin, ku në një kafene në rrugën “Ibrahim Rugova” humbën jetën dy persona si pasojë e të shtënave me armë zjarri. Ngjarja ndodhi rreth orës 12:32 dhe ka lënë edhe dy persona të plagosur.
Sipas informacioneve nga qendra.info, i dyshuari për këtë ngjarje është Mefail Shkodra, një person me të kaluar kriminale, i cili vitin e kaluar ishte arrestuar për fajde dhe aktualisht ndodhet në arrati.
Zëdhënësi i Policisë për rajonin e Gjilanit, Ismet Hashani, konfirmoi se njësitet relevante dhe Prokuroria janë në vendin e ngjarjes dhe po hetojnë rrethanat e kësaj ngjarjeje tragjike. “Në këtë rast mjeku kujdestar ka konstatuar vdekjen e dy personave, ndërsa dy të tjerë janë plagosur dhe kanë marrë ndihmë në qendrën emergjente. I dyshuari, shtetas i Kosovës dhe i njohur për policinë, është në arrati,” tha Hashani.
Një kërkim i thjeshtë në rrjetet sociale tregon se Mefail Shkodra ka postuar foto me vetura luksoze dhe me figura politike si presidentja Vjosa Osmani, kryeministri Albin Kurti dhe kryetari i Prishtinës, Përparim Rama.
