Sipas agjencisë Associated Press, postimi i Hegseth ka nxjerrë në pah lidhjet e tij të afërta me një lëvizje nacionaliste të krishterë që promovon qëndrime ekstreme rreth rolit të fesë dhe të grave në shoqëri.
Hegseth publikoi në platformën X një video gati shtatëminutëshe nga CNN, e cila heton aktivitetet e Doug Wilsonit, bashkëthemelues i Komunitetit të Kishave të Reformuara Ungjillore (CREC).
Në videon e publikuar, njëri prej pastorëve nga kisha e Wilsonit deklaron hapur se “grave duhet t’u hiqet e drejta e votës”, ndërsa një tjetër thekson: “në botën e tij ideale do të votonte i gjithë familja si një njësi e vetme”. Gjithashtu, një anëtare e komunitetit thotë se “i bindet plotësisht burrit të saj”.
Hegseth e shoqëroi videon me një koment të vetëm, por domethënës: “i gjithë Krishti për gjithë jetën”. Postimi i tij mori mbi 12 mijë pëlqime dhe 2000 shpërndarje, duke ndarë opinionin mes mbështetjes dhe kritikave të forta.
Doug Pagitt, pastor dhe drejtor ekzekutiv i organizatës progresive ungjillore “Vote Common Good”, reagoi ashpër duke thënë se këto ide përfaqësojnë “një grup të vogël të krishterësh” dhe i cilësoi “shumë shqetësuese” përfshirjen e Hegseth në përhapjen e tyre.
Ndërkohë, zëdhënësi i Pentagonit, Sean Parnell, konfirmoi të premten se Hegseth është “anëtar krenar i një kishe” të lidhur me CREC-në dhe se “vlerëson shumë veprat dhe mësimet e zotit Wilson”.
Ky nuk është rasti i vetëm kur Hegseth ka përdorur pozicionin e tij për të promovuar agjendën fetare. Në muajin maj, ai kishte ftuar pastorin e tij personal, Brooks Potteiger, që të udhëhiqte një shërbesë lutjeje brenda Pentagonit gjatë orarit të punës, me ftesa që u dërguan në adresat zyrtare të punonjësve.
Vetë Wilson, në një deklaratë për CNN, ka përmbledhur qartë vizionin e kësaj lëvizjeje:
“Do të doja që kombi të ishte një komb i krishterë dhe që bota të ishte një botë e krishterë”.
