Në Brandenburg të Gjermanisë, terapeutja Natalie Viaux nuk mat tensionin e pacientëve, por i pyet për jetën, sfidat dhe burimet që kanë.
Klinika ku ajo punon po eksperimenton me “recetat sociale” – një qasje që përmirëson shëndetin duke “përshkruar” aktivitete si shëtitje në pyll, vizita në muze, sport ose art. Qëllimi është forcimi i lidhjeve shoqërore dhe mbështetjes komunitare, raporton Euronews Health transmeton Gazeta Shneta.
Mjekët identifikojnë pacientë me probleme sociale që dëmtojnë mirëqenien – vetmi, humbje, vështirësi financiare, papunësi – dhe i dërgojnë te “punonjësit lidhës” si Viaux, të cilët hartojnë plane të personalizuara për ta. Kjo u jep njerëzve mundësi të rimarrin kontrollin mbi shëndetin, duke ulur edhe ngarkesën mbi sistemet shëndetësore.
Kjo lëvizje ka origjinën në Mbretërinë e Bashkuar, tashmë praktikohet në mbi 30 vende.
Aktualisht, 22 qendra shëndetësore në tetë shtete evropiane po testojnë këtë metodë tek refugjatët, të moshuarit që jetojnë vetëm dhe komuniteti LGBTQ, në kuadër të një projekti pesëvjeçar me 7 milionë euro financim nga BE-ja.
“Recetat sociale” shkojnë përtej shërbimeve tradicionale, duke ofruar, për shembull, kurse qeramike ose kopshte komunitare. Suksesi shpesh varet nga cilësitë e punonjësve lidhës: inteligjencë emocionale, kreativitet dhe aftësia për të motivuar njerëzit që të bëjnë hapin e parë.
Megjithëse përfitimet raportohen si të dukshme – përmirësimi i shëndetit mendor e fizik, më pak vizita tek mjeku – sfida mbetet provimi shkencor i efektivitetit. Projekti aktual do të krahasojë pacientët që marrin receta sociale me ata që marrin kujdes standard, për të ndikuar politikat shëndetësore.
Dr. Sam Everington, një nga pionierët e kësaj lëvizje, e quan këtë “ilaçi magjik” që kërkohej prej kohësh: një mënyrë për të trajtuar shumë sëmundje përmes lidhjes njerëzore, kulturës dhe natyrës.
