Pas mbledhjes së mbi 1,200 nënshkrimeve nga qytetarët dhe çertifikimit nga Komisioni Qendror i Zgjedhjeve (KQZ), ish-kryetari i Hanit të Elezit, Rufki Suma, ka zyrtarizuar kandidimin e tij për të parin e komunës në zgjedhjet që do të mbahen më 12 tetor të këtij viti.
Duke garuar nën moton “Gjithnjë në shërbim të popullit”, Suma ka kujtuar se gjatë mandateve të kaluara, së bashku me qytetarët dhe me mbështetjen e donatorëve vendorë e ndërkombëtarë, janë realizuar shumë projekte në interes të komunës. Ai ka premtuar se edhe në të ardhmen, me ndihmën e Zotit dhe të njëjtëve partnerë, do të vazhdojë të punojë për zhvillimin e Hanit të Elezit, duke përcaktuar prioritetet përmes debateve publike me qytetarët.
Suma u ka bërë thirrje banorëve të komunës që të respektojnë njëri-tjetrin gjatë fushatës, duke mos ofenduar apo etiketuar asnjë kandidat për kryetar apo për këshilltarë të kuvendit komunal. Ai ka theksuar se vota duhet të jetë e lirë dhe e pandikuar:
“Votoni ata që ju mendoni se është më i miri dhe punon për interesin e komunës suaj”, ka deklaruar Suma.
Zgjedhjet për kryetar të komunës së Hanit të Elezit do të zhvillohen më 12 tetor, ndërsa Rufki Suma hyn në garë si kandidat i pavarur me mbështetjen e drejtpërdrejtë të qytetarëve.
Poatimi i plotë:
Rufki Suma – Të nderuar qytetarë të Hanit të Elezit, pas… | Facebook
