Shqiptarët dhe turistët kanë shpenzuar 800 milionë euro në bare e restorante gjatë vitit 2023, duke e bërë këtë sektor një nga motorët kryesorë të ekonomisë së shërbimeve.
Monitor.al shkruan këtë të martë duke iu referuar të dhënave që ka marrë nga INSTAT, se të ardhurat në këtë sektor u rritën me 17% në krahasim me vitin 2022, ndërsa fitimet neto arritën 13.8 miliardë lekë. Turizmi në rritje dhe çmimet më të larta kanë ndikuar ndjeshëm në këtë ecuri pozitive, sidomos në zonat bregdetare dhe urbane.
Megjithëse pandemia uli përkohësisht qarkullimin, sektori u rikthye fuqishëm në vitin 2022 dhe 2023.
Monitor shkruan se rritja e të ardhurave në këto biznese po ndodh kryesisht për dy arsye. E para, numri i turistëve që vizitojnë Shqipërinë po rritet me ritme të larta nga viti në vit, çka ka ndikuar në zgjerimin e konsumit në këto njësi. Së dyti të ardhurat në këto biznese janë ndihmuar edhe nga rritja e çmimeve.
Rritja e numrit të turistëve dhe inflacioni mbi 13% në grupin e ushqimeve pas luftës në Ukrainë ndikuan në rritjen e çmimeve në restorante dhe bare, duke gjeneruar të ardhura më të mëdha. Në të njëjtën kohë, konsolidimi i rrjeteve të mëdha të restoranteve dhe mbyllja e bizneseve të vogla në zonat rurale sollën ulje të numrit të njësive, ndërsa numri i të punësuarve u rrit vetëm me 2.3%.
Ekspertët vlerësojnë se gastronomia shqiptare, ende pak e komercializuar dhe me ndikime osmane, italiane e ballkanike, ka potencial të madh për zhvillim të mëtejshëm.
Turizmi gastronomik po tërheq gjithnjë e më shumë vizitorë që kërkojnë përvoja autentike, ndërsa emigrantët kanë sjellë ndikime mesdhetare që po pasurojnë më tej kuzhinën vendase. Megjithatë, sektori ka ende nevojë për më shumë standardizim, trajnime dhe promovim për të përmbushur kërkesat e tregut ndërkombëtar.
