Dy vite pas lançimit si konkurrent i Twitter (tani X), Meta ka njoftuar se Threads ka kaluar 400 milionë përdorues aktivë mujorë. Lajmin e dha drejtuesi i Instagram-it, Adam Mosseri, i cili tha se platforma ka evoluar nga një ide e çmendur për të konkurruar Twitter-in, në një hapësirë të rëndësishme për shkëmbim të hapur mendimesh. Vetëm në tremujorin e fundit, Threads ka shtuar 50 milionë përdorues aktivë mujorë, pasi në fund të prillit Mark Zuckerberg njoftoi se platforma kishte arritur 350 milionë.
Nga ana tjetër, X ka mbi 600 milionë përdorues aktivë mujorë. Sipas të dhënave të Similarweb, Threads po i afrohet X në përdoruesit aktivë ditorë në aplikacionet mobile: në qershor 2025, Threads arriti 115.1 milionë përdorues aktivë ditorë në iOS dhe Android, një rritje prej 127.8% krahasuar me vitin e kaluar. X pati 132 milionë, por me një rënie prej 15.2% nga viti në vit.
Megjithatë, në vizitat ditore përmes web-it, X vazhdon të jetë shumë përpara: 145.8 milionë vizita mesatare ditore në mbarë botën në qershor, kundrejt vetëm 6.9 milionëve të Threads.
Rritja e Threads vjen pasi platforma ka shtuar shumë funksione të reja vitin e fundit, përfshirë mesazhe direkte, integrime me fediverse, feed-e të personalizuara, përmirësime me AI dhe më shumë.
