Muzikanti dhe aktivisti kulturor Isah Mustafa do të garojë për Asamblenë Komunale të Prishtinës nga radhët e Partisë Demokratike të Kosovës (PDK). Kandidatura e tij u prezantua nga Uran Ismaili, kandidat i PDK-së për kryetar të kryeqytetit, gjatë publikimit të listës së kandidatëve.
Mustafa është bashkëthemelues i hapësirës kulturore “Stereospace” dhe ka realizuar projekte të shumta për gjallërimin e komunitetit, përfshirë rivitalizimin e Shtëpisë së Kulturës në Llukar, të kthyer nga një ndërtesë e rrënuar në një hapësirë aktive për banorët. Ai ka qenë i angazhuar edhe në programe edukative për fëmijë dhe të rinj.
Përveç punës në komunitet, Mustafa është anëtar i grupit të muzikës alternative “Gillespie”, një band underground rock’n’roll e themeluar në vitin 2005, me ndikim të rëndësishëm në skenën muzikore vendore.
Kjo garë lokale në Prishtinë po karakterizohet nga pjesëmarrja e shumë figurave nga arti dhe kultura, përfshirë edhe aktoret Driada Matoshi dhe Vlora Merovci nga radhët e Lëvizjes Vetëvendosje (LVV).
