Gazeta gjermane Bild shkruan se Serbia po futet në një krizë të rëndë politike dhe shoqërore, pasi për të tretën natë me radhë shpërthyen protesta të dhunshme kundër pushtetit të presidentit Aleksandar Vuçiç.
Në Novi Sad, demonstruesit kanë thyer xhama dhe demoluar zyra të partisë në pushtet SNS, ndërsa në Beograd përkrahësit e Vuçiçit kanë sulmuar kundërshtarët me piroteknikë. Në disa qytete janë djegur kontejnerë dhe janë ngritur barrikada policore. Ministri i Brendshëm Ivica Daçiç raportoi për gjashtë policë të plagosur dhe dhjetëra të arrestuar.
Sipas Bild, shoqëria serbe po ndahet gjithnjë e më shumë. Demonstratat kanë nisur pas tragjedisë së 1 nëntorit 2024 në Novi Sad, ku shembja e një strukture të rinovuar shkaktoi vdekjen e 16 personave. Opozita dhe ekspertët akuzojnë qeverinë për korrupsion dhe neglizhencë.
Vuçiç ndërkohë ka paralajmëruar “pastrimin e rrugëve nga kriminelët”, gjë që, sipas Bild, vetëm sa rrit frikën për një përplasje të re të madhe në vend.
