Presidenti Trump u tha udhëheqësve evropianë, pas takimit të tij me presidentin rus Vladimir Putin të premten në Alaskë, se ai mbështeste një plan për t’i dhënë fund luftës në Ukrainë duke ia dorëzuar pushtuesve rusë territore ende të papushtuara, në vend që të përpiqej për një armëpushim, sipas dy zyrtarëve të lartë evropianë të cilët u informuan për thirrjen.
Trump do ta diskutojë atë plan me presidentin e Ukrainës, Volodymyr Zelensky, të hënën në Shtëpinë e Bardhë, dhe udhëheqësit evropianë janë të ftuar të marrin pjesë, thanë zyrtarët, duke folur me kushtin e anonimatit për të diskutuar biseda private.
Pas takimit me Putinin, Trump hoqi dorë nga kërkesa e tij për një armëpushim të menjëhershëm dhe beson se një marrëveshje e shpejtë paqeje mund të negociohet, për sa kohë që Zelensky pranon t’i dorëzojë Rusisë pjesën e mbetur të rajonit të Donbasit, madje edhe ato zona që nuk janë të pushtuara nga trupat ruse.
Zelensky dhe udhëheqësit evropianë e kanë kundërshtuar fuqimisht një lëshim të tillë të tokave të papushtuara, të cilat përmbajnë gjithashtu linja të rëndësishme mbrojtëse dhe pasuri minerale. Zyrtarët ukrainas kanë thënë se një marrëveshje përfundimtare nuk mund të përfshijë që Kievi të pajtohet të dorëzojë përgjithmonë ndonjë territor sovran ukrainas, pasi kjo do të shkelte Kushtetutën e Ukrainës.
Në këmbim, Putin ofroi një armëpushim në pjesën tjetër të Ukrainës sipas vijave aktuale të frontit dhe një premtim me shkrim që nuk do të sulmojë më Ukrainën apo ndonjë vend evropian, thanë zyrtarët e lartë. Ata i vunë në dukje Trump-it se Putini shpesh ka thyer angazhimet e tij të shkruara.
Do të mbetet në dorën e Ukrainës të marrë vendime për territorin e saj, theksuan zyrtarët, duke shtuar se kufijtë ndërkombëtarë nuk duhet të ndryshohen me forcë.
Trump nuk përmendi gjatë thirrjes vendosjen e ndonjë sanksioni apo presioni ekonomik shtesë ndaj Rusisë, thanë zyrtarët. Por udhëheqësit evropianë theksuan se ata do të vazhdojnë sanksionet dhe presionin ekonomik mbi Rusinë derisa të ndalen vrasjet, tha një zyrtar.
Trump tha se ishte optimist për realizimin e një takimi trepalësh me Putinin dhe Zelenskyn, thanë zyrtarët. Por deri tani, Putini ka refuzuar të takohet me Zelenskyn, duke e konsideruar atë president të paligjshëm të një shteti artificial.
