nga Oregon Health & Science University
Kriza e shëndetit mendor tek të rinjtë në SHBA ka arritur në një pikë kritike: mijëra fëmijë, kryesisht të prekur nga sjellje të lidhura me vetëvrasjen dhe depresioni, po mbesin me ditë të tëra në dhomat e urgjencës së spitaleve, sipas një hulumtimi të ri nga Oregon Health & Science University.
Studimi, i publikuar në revistën JAMA Health Forum, ka analizuar të dhënat e Medicaid nga viti 2022.
Nga 255,000 vizita në urgjencat spitalore për probleme të shëndetit mendor që përfshinin fëmijë të siguruar nga Medicaid, më shumë se një në dhjetë raste përfunduan me “mbajtje” të fëmijëve në urgjencë për 3 deri në 7 ditë, pasi nuk kishte shtretër të lirë në repartet e kujdesit akut.
“Është e qartë se në një botë ideale kjo nuk do të ndodhte fare,” tha autori kryesor John McConnell, Ph.D., drejtor i Qendrës për Efektivitetin e Sistemeve Shëndetësore në OHSU.
Për fëmijët në krizë të shëndetit mendor, shpesh nuk gjendet një shtretër i lirë në spital ose nuk ka mundësi që ata të dërgohen në kushte më të përshtatshme, si një institucion rezidencial për kujdes të shëndetit mendor.
“Prindi shkon në urgjencë me fëmijën që ka krizë, dhe idealisht duhet të gjendet një vend më i përshtatshëm për trajtim pas kësaj. Por studimi tregon se shpesh nuk ka ku të dërgohen,” shtoi McConnell.
Ekspertët thonë se problemi është përkeqësuar vitet e fundit, pasi kapaciteti për trajtime të brendshme nuk ka mbajtur hapin me rritjen e numrit të fëmijëve në krizë.
Shembull: numri i fëmijëve që kanë kërkuar konsultë psikiatrike në urgjencën e spitalit pediatrik OHSU Doernbecher është trefishuar – nga 150 raste në vitin 2016 në 453 vitin e fundit, tha Dr. Rebecca Marshall, profesoreshë e psikiatrisë në Fakultetin e Mjekësisë në OHSU.
Ajo theksoi se mbajtja e fëmijëve me ditë të tëra në urgjencë ka “ndikim të madh” te vetë fëmijët, familjet e tyre dhe stafi shëndetësor.
“Mjekët dhe infermierët që punojnë me fëmijë e bëjnë këtë sepse duan t’i shohin ata të përmirësohen. Por kur një fëmijë mbetet me ditë në urgjencë pa marrë kujdesin që i nevojitet, gjendja mund t’i përkeqësohet. Kjo është demoralizuese e dërrmuese, sidomos kur ka shumë fëmijë të tjerë që kërkojnë kujdes,” tha Marshall.
McConnell shtoi se kjo situatë tregon mungesën e theksuar të kujdesit të përshtatshëm në Oregon dhe në gjithë SHBA-në.
“Nuk ka një institucion të vetëm që mban përgjegjësi për shëndetin mendor të fëmijëve të siguruar nga Medicaid. Në plan afatgjatë duhet të shohim nëse kemi kombinimin e duhur të shërbimeve për këta pacientë dhe të sigurohemi që ata të mbështeten nga Medicaid dhe sigurues të tjerë,” theksoi ai.
