Një studim i ri i Institutit të Shëndetit Global në Barcelonë (ISGlobal), i botuar në The Lancet Planetary Health, zbulon se grimcat e imta të tymit nga zjarret pyjore (PM2.5) rrisin ndjeshëm rrezikun e vdekshmërisë dhe ndikimi i tyre është nënvlerësuar gati 14 herë më pak.
Hulumtimi, i bazuar në të dhëna nga 32 shtete evropiane dhe mbi 541 milionë banorë, tregon se rritja e niveleve të PM2.5 të lidhura me zjarret shton rrezikun e vdekjes për shkak të sëmundjeve respiratore dhe kardiovaskulare. Për çdo rritje prej 1 µg/m³, vdekshmëria nga të gjitha shkaqet rritet me 0.7%.
Në periudhën 2004–2022, llogaritet që ekspozimi afatshkurtër ndaj tymit të zjarreve pyjore shkaktoi mesatarisht 535 vdekje në vit, shumë më tepër sesa vlerësimet e mëparshme që flisnin për vetëm 38 raste, shkruan MedicalXpress.
Sipas studiuesve, ndryshimet klimatike të shkaktuara nga njeriu janë faktor kyç që shtojnë intensitetin dhe shpeshtësinë e zjarreve, duke e bërë problemin një kërcënim serioz për shëndetin publik.
Më të prekurat sipas analizës rezultuan vendet e Europës Lindore si Bullgaria, Rumania, Hungaria dhe Serbia, ndërsa në disa rajone të Spanjës e Portugalisë efektet ishin më të dobëta.
Studiuesit theksojnë se duhen politika dhe masa të reja të përshtatura për këtë ndotje specifike, pasi tymi nga zjarret është shumë më i rrezikshëm sesa grimcat e zakonshme nga burime të tjera si trafiku.
