Depresioni dihet se ndikon negativisht në shëndetin e zemrës, por një studim i ri ka zbuluar se ky rrezik është më i theksuar tek gratë sesa tek burrat.
Sipas hulumtimit të publikuar në revistën “JACC: Asia”, të gjithë personat me depresion përballen me një rrezik më të lartë për sëmundje kardiovaskulare. Megjithatë, gratë me depresion i zhvillojnë këto sëmundje më shpesh se burrat, shkruan Health News transmeton Qendra info.
Studimi u krye duke analizuar të dhënat e mbi 4.1 milionë pjesëmarrësve në Japoni midis viteve 2005 dhe 2022.
Asnjë prej tyre nuk kishte histori të mëparshme të sëmundjeve të zemrës. Prej tyre, 1.75 milionë ishin gra dhe 2.37 milionë burra, me moshë mesatare 44 vjeç. Pjesëmarrësit iu nënshtruan kontrollit shëndetësor fillestar dhe u ndoqën për rreth 3.5 vjet për të parë lidhjen midis depresionit dhe sëmundjeve kardiovaskulare.
Rezultatet treguan një lidhje të fortë mes depresionit dhe rasteve si infarkti, angina, goditja në tru, dështimi i zemrës dhe fibrilacioni atrial.
Raporti i rrezikut ishte 1.39 tek burrat, ndërsa 1.64 tek gratë, duke treguar një ndikim më të madh për to.
Shkencëtarët sugjerojnë se gratë mund të përjetojnë simptoma më të rënda të depresionit, si dhe ndryshime hormonale gjatë shtatzënisë ose menopauzës, që ndikojnë drejtpërdrejt në shëndetin e zemrës.
Për më tepër, gratë me depresion kanë më shumë gjasa të vuajnë nga hipertensioni, diabeti dhe obeziteti, faktorë që rrisin rrezikun kardiovaskular.
Autorët theksojnë rëndësinë e diagnostikimit të hershëm dhe trajtimit të depresionit, sidomos tek gratë, për të parandaluar pasojat serioze në zemër.
