Pas publikimit të aktgjykimit të Gjykatës Kushtetuese, ka filluar seanca për konstituimin e Kuvendit të Kosovës, e cila shënon hapin e parë drejt formimit të legjislaturës së nëntë.
Gjykata Kushtetuese ka sqaruar në vendimin e saj se Kuvendi duhet të zgjedhë kryetarin përmes votimit të hapur, brenda një afati prej 30 ditësh, duke lejuar jo më shumë se tri raunde votimi për të njëjtin kandidat.
Afati kushtetues ka filluar të rrjedhë nga data 18 gusht 2025, që do të thotë se Kuvendi ka kohë deri më 17 shtator për ta zgjedhur kryetarin.
Lëvizja Vetëvendosje, e cila pretendon shumicën parlamentare, ka propozuar dy herë kandidate për kryetare të Kuvendit:
Fillimisht u propozua Albulena Haxhiu,
Ndërsa në këtë seancë, u propozua Donika Gërvalla.
Megjithatë, asnjëra prej tyre nuk ka arritur të sigurojë votat e nevojshme, duke shtuar pasiguri rreth rrjedhës së mëtejme të procesit të konstituimit.
Në ditët në vijim pritet të shihet nëse Vetëvendosje do të propozojë një kandidat të tretë, apo do të kërkojë një marrëveshje me partitë tjera për të siguruar shumicën e nevojshme.
