Presidenti i Shteteve të Bashkuara, Donald Trump, synon që t’i lërë Rusinë dhe Ukrainën që të organizojnë një takim mes udhëheqësve të tyre pa luajtur vetë rol drejtpërdrejt tani për tani, sipas zyrtarëve të administratës që kanë njohuri rreth situatës, duke bërë një hap prapa nga bisedimet për përfundimin e luftës në Ukrainë.
Faza e ardhshme në sytë e Trumpit për përfundimin e luftës në Ukrainë mbetet një takim dypalësh mes presidentëve Vladimir Putin të Rusisë dhe Volodymyr Zelensky të Ukrainës, thanë zyrtarët, shkruan gazeta “The Guardian”.
Trumpi u ka thënë këshilltarëve ditëve të fundit se synon që të mbajë një takim trepalësh me dy presidentët vetëm pasi ata të jenë takuar fillimisht mes vete, edhe pse mbetet e paqartë nëse kjo do të ndodhë dhe presidenti amerikan synon që të mos përfshihet në këtë përpjekje.
Në një intervistë telefonike të martën, Trumpi gjithashtu tha se mendon që do të ishte më mirë nëse Putini e Zelensky takohen pa praninë e tij në rastin e parë. “Unë vetëm dua të shoh se çfarë ndodh në takim. Pra, ata janë në procesin e organizimit të tij dhe ne do të shohim se çfarë ndodh” – tha kreu i Shtëpisë së Bardhë.
Ngurrimi i Trumpit për t’i shtyrë Putinin e Zelenskyn drejt takimit vjen në kohën kur ai ditëve të fundit ka pranuar se përfundimi i luftës në Ukrainë ka qenë më i vështirë sesa ka pritur, pasi fillimisht kishte premtuar në fushatën zgjedhore se do ta arrinte këtë brenda 24 orëve.
Një zyrtar i lartë i administratës amerikane e përshkroi situatën si qasje “prit dhe shiko” nga Trumpi, për të marrë vesh nëse takimi mes Putinit e Zelenskyt mund të caktohet. Megjithatë, ka pasur pak shenja të prekshme ditëve të fundit për progres dhe Shtëpia e Bardhë nuk ka një listë të ngushtë të vendeve ku do të mund të zhvillohej takimi.
Shtëpia e Bardhë tha në një deklaratë se “Trumpi dhe ekipi i tij i sigurisë kombëtare vazhdojnë që të angazhohen me zyrtarë rus e ukrainas drejt një takimi dypalësh për t’i ndalur vrasjet dhe për t’i dhënë fund luftës… Nuk është në interesin kombëtar që të negociohen këto çështje më tej publikisht.”
Pas takimeve në Shtëpinë e Bardhë me Zelenskyn dhe disa udhëheqës të tjerë evropianë, Trumpi bisedoi në telefon me Putinin për rreth 40 minuta. Ndihmësi i presidentit rus për politikë të jashtme, Yuri Ushakov, më vonë tha se dy presidentët u pajtuan që të caktohen negociatorë më të lartë për bisedimet e drejtpërdrejta mes Rusisë e Ukrainës.
