Një burrë ukrainas u arrestua në Itali nën dyshimin për bashkërendimin e sulmeve të vitit 2022 ndaj gazsjellësit “Nord Stream”, thanë të enjten prokurorët gjermanë, duke sinjalizuar një zhvillim të rëndësishëm në episodin që i kishte ashpërsuar tensionet mes Rusisë e Perëndimit.
Të para nga Moska e Perëndimi si akte sabotimi, shpërthimet kishin dëmtuar rëndë gypat që bartin gaz nga Rusia për në Evropë, duke shënuar një përshkallëzim të madh në konfliktin e Ukrainës dhe duke i tkurrë dërgesat e energjisë në kontinent. Askush nuk e ka marrë përgjegjësinë për shpërthimet, raporton agjencia e lajmeve “Reuters”.
“Bombardimi i gazsjellësit duhet të hetohet, përfshirë ndjekjen penale. Prandaj, është mirë që ne jemi duke bërë progres në këtë aspekt” – tha në një deklaratë ministrja e Drejtësisë e Gjermanisë, Stefanie Hubig.
Nuk pati koment të menjëhershëm nga ambasada ukrainase. Ukraina në të kaluarën ka mohuar se është e përfshirë në këto sulme.
I dyshuari, i identifikuar si Serhii K., ishte pjesë e një grupi të personave që kishin vendosur pajisje në gypa afër ishullit të Detit Baltik, Bornholm, në shtatorin e vitit 2022, thuhet në një deklaratë të zyrës së prokurorit gjerman.
Ai dhe bashkëpunëtorët e tij ishin nisur nga bregdeti verilindor i Gjermanisë në Rostock përmes një barke për ta kryer sulmin, thuhet më tej. Barka ishte marrë me qira nga një kompani gjermane me ndihmën e dokumenteve të falsifikuara të identifikimit përmes ndërmjetësve, tha prokuroria gjermane.
Autoritetet italiane e arrestuan burrin ukrainas sipas një urdhërarresti. Ai akuzohet për bashkëpunim për shkaktim të shpërthimit, sabotim antikushtetues dhe shkatërrim të strukturave të rëndësishme.
Karabinierët italianë e arrestuan atë natën në provincën Rimini, në bregdetin e Adriatikut, thuhet në deklaratën e prokurorëve gjermanë. Karabinierët e konfirmuan arrestimin, por nuk dhanë hollësi të mëtejme.
